Հունաստան-Թուրքիա

8 ր.   |  2019-08-26

Նոր լարվածություն

Հույն-թուրքական հարաբերություններում առկա խնդիրներին 2019թ. ավելացավ ևս մեկը։ Միջերկրական ծովի արևելյան հատվածում՝ Կիպրոսի բացառիկ տնտեսական գոտում, Թուրքիան, հաշվի չառնելով միջազգային հանրության արձագանքը, շարունակում է իրականացնել գազի որոնման և հորատման աշխատանքներ։ Թուրքիան իր այս կեցվածքով քաղաքական և տնտեսական պայքարի մեջ է մտնում, որպեսզի փորձի ընդգծել Հյուսիսային Կիպրոսի ինքնահռչակ թուրքական հանրապետության միջազգային իրավունքի տեսանկյունից  իրավահավասար և ինքնուրույն դերակատար լինելու հանգամանքը՝ հակադրվելով Կիպրոսի Հանրապետությանը։

Թուրքիայի վարած զավթողական քաղաքականությանն ի հակակշիռ՝ Կիպրոսի օրինական իշխանություններն ու Հունաստանը պաշտպանում են  իրենց բնական, անօտարելի իրավունքները։ Այս և անցյալից ժառանգություն մնացած խնդիրներով էլ պայմանավորվում է Թուրքիայի և Հունաստանի ներկա լարվածությունը։